Harka, parka...

Húsmóðirin las Skilaboðaskjóðuna eftir Þorvald Þorsteinsson fyrir drenginn í gærkvöldi. Bæði voru ægilega spennt og gátu ekki hætt að lesa fyrr en bókin var búin og Næturtröllið orðið að steini. Lesturinn fékk húsmóðurina til að hugsa um leikritið sem sýnt var í Þjóðleikhúsinu fyrir u.þ.b. tíu eða ellefu árum. Finnst henni alveg kominn tími á að sýna það leikrit aftur. Sagan er alveg frábær og leikgerðin, tónlistin og allt í kringum leikritið var alveg einstaklega skemmtilegt. Vill húsmóðirin leyfa sér að segja að Skilaboðaskjóðan sé eitt besta íslenska barnaleikrit sem sett hefur verið upp. Það er alveg kominn tími á að sjá Stóradverg, Dreitil skógardverg, Skemil njósnadverg, Putta, Möddumömmu og Næturtröllið aftur á sviði.

(Ef húsmóðirin í vesturbænum les þetta getur hún kannski komið ábendingunni á framfæri við vinkonu sína í leikhúsi allra landsmanna).
Og svo allir saman nú: "Harka, parka. Harka, parka, inn skal arka. Nú allir saman einum rómi, annars er það ekk'að marka. Harka, parka. Harka, parka. Harka, parka, inn skal arka."

Stóra systir kennir litlu systur handtökin

Móðursystir

Nú er húsmóðirin loksins orðin móðursystir. Litla systir tók helgina í að hamast við að pota litlum dreng í heiminn sem var knúsaður í bak og fyrir af afa, ömmu og nýbakaðri móðursystur í gærkvöldi. Litli kall er algert krútt eins og öll börn í þessari fjölskyldu. Nú verður stuð á jólunum hjá afa og ömmu í Kjaló. Ferfalt húrra fyrir krílum af Kjalarlandsslektinu: Húrra, húrra, húrra, húrraaaaaaa!

Hætt

Húsmóðirin hefur parkerað gjafahöldurunum og er farin að ganga í venjulegum brjóstahaldara. Eftir níu mánaða mjólkurtíð hefur hún ákveðið að nú sé sú stutta orðin stór. Hér eftir verður engin mjólk í boði nema kúamjólk. Hætt, búin, farin, bless!

kitl

Um þessar mundir tíðkast í bloggheimum að kitla. Húsmóðirin var aldrei klukkuð en hún virðist ekki ætla að sleppa undan þessu kitl veseni. Þannig að...

7 hlutir sem ég ætla að gera áður en ég dey:
(þegar húsmóðirin var unglingur gerði hún svona lista - held að það sé búið að merkja við flestallt sem á honum var)
- Halda áfram að vera hamingjusöm
- Fara til Japan
- Eignast barnabörn (ræð kannski ekki miklu um það en ætla samt)
- Skíða í Ölpunum
- Klára meistaraprófið
- Flytja í stærra húsnæði
- Eignast það mikið af peningum að ég þurfi ekki að hafa áhyggjur af þeim síðustu árin áður en ég dey.

7 hlutir sem ég get:
- skrifað
- keyrt
- hjólað
- elskað
- grátið
- hlegið
- gengið með börn


7 hlutir sem ég get alls ekki:
- fætt börn
- snert nefið með tungunni
- logið á sannfærandi hátt
- talað lágt ef mikið liggur við
- gengið á höndum
- farið í spígat (get næstum farið í splitt)
- hætt að elska fjölskylduna mína

7 hlutir sem heilla mig við hitt kynið:
- vel snyrtar hendur
- heiðarleiki
- húmor
- samræðulist
- gáfur
- björt og lifandi augu
- stuttklipptur hnakki sem er gott að strjúka

7 frægir sem heilla:
- James Spader
- Dustin Hoffman (dáldið gamall en alltaf æðislegur)
- Örninn er dáldið sætur
- David Ginola (geðveikur kroppur með flottan hreim - og svo er hann líka trekkari)
- Svartinaggur þegar hann var hasarmyndahetja
- Tim Burton (man ekkert hvernig hann lítur út en hann býr til heillandi myndir)
- Shakespeare

7 orð eða setningar sem ég nota mikið:
- jamm...
- Halló!
- Þú ert að grínast!
- Ég get svo svarið það!
- Ég skal telja hvað þú getur verið fljótur (notað svona 10 sinnum á dag)
- æi
- Góða nótt og sofðu rótt, Guð og englarnir vaka yfir þér í alla nótt

7 hlutir sem ég sé núna:
- Lampi
- Vatnsflaska
- Body lotion
- Skólataska
- Straumbreytir
- Bílar
- Giftingahringur

Af tillitssemi við aðra bloggara ætlar húsmóðirin ekki að kitla neinn. Verði þeim að góðu sem hafa gaman af að lesa þetta.

Jæks

Húsmóðirin er með í maganum. Sú stutta er komin í pössun hjá ókunnugri konu útí bæ. Slíkt heitir víst að vera með barnið hjá dagmömmu. Hún brosti og vinkaði mömmu sinni þegar hún fór. Mamman var bara með hnút í maganum. Skrýtið að þetta skuli vera erfiðara núna en það var fyrir þremur árum.

Neytendapistill

Húsmóðirin er mjög meðvitaður neytandi. Allavega stundum. Í því skyni kaupir hún ýmsar nauðsynjavörur til heimilisins í lágvöruverðsverslunarkeðju hér í bæ. Hefur hún það fyrir algera reglu að fara ekki í slíka verslun á háannatíma því þá tekur troðningsgeðveikin yfirhöndina og ýmislegt misgáfulegt lendir ofan í körfunni. Húsmóðirin hefur eigendur verslunarkeðjunar reyndar grunaða um að ýta undir troðningsgeðveikina með því að dæla einhverjum undarlegum efnum út í verslunina á annatímum en það er meira svona samsæriskenning. Sökum þess að húsmóðirin verslar alltaf þegar fátt fólk er í búðinni er hún einstaklega yfirveguð við innkaupin og gefur sér tíma til að bera saman verð á mismunandi vörutegundum í hillunum. Og þá er komið að kjarna málsins því margt athyglisvert kemur í ljós við slíka skoðun. Margir eru þeirrar skoðunar að magnpakkningar þýði ósjálfrátt hagkvæm innkaup. Í þessari keðju er það ekki alltaf raunin. Tökum dæmi: 1 lítri af uppþvottavéladufti er hlutfallslega ódýrari en 2,5 lítri af sama uppþvottavéladufti, ergó: það er ódýrara að kaupa minni pakkninguna. Risapappakassi fullur af bleium (129 stk.) kostar 1.999.- eða 15,50 pr.stk. Ef keyptur er venjulegur tvöfaldur pakki þá kostar hann um 800.- en í honum eru ca. 65 stk. og kostar stykkið þá 12,30 ergó: það er dýrara að kaupa fleiri bleiur í einu.

Svona fara menn að því að kaupa sér tvö hús og þotu!

DNA breytingar

Húsmóðirin horfði á heilara og lækni takast á í Kastljósi í gær. Alltaf gaman þegar andstæðir pólar takast á, sér í lagi þegar þeir tveir sem att er saman tala gersamlega sitthvort tungumálið. Húsmóðurinni þóttu hugmyndir heilarans athyglisverðar, sér í lagi þær sem lutu að því hversu auðvelt á að vera að breyta DNA hjá Jóni og Gunnu. Húsmóðurina hefur lengi dreymt um að vera með lengri leggi, minni brjóst og meira kúlulaga rass svo eitthvað sé nefnt. Þá mætti einnig laga sjónina svo gleraugun væru óþörf. Nú íhugar hún alvarlega að setja sig í samband við svona DNA heilara og athuga hvort ekki sé hægt að kippa þessu í lag með því að breyta erfðaefnunum. Svo mætti kannski skerpa á heilastarfseminni örlítið svo að húsmóðirin geti reynt fyrir sér í Meistaranum hjá Loga Bergmann. Hann er alltaf svo sjarmerandi. Kannski húsmóðirin reyni bara fyrst að ræða við stofnfrumuna sína og sjá hvort hún getur ekki bara kippt þessu í liðinn...

Heimahangandi...

Systir húsmóðurinnar kom með nýtt hugtak í gær: heimahangandi húsmóðir. Held að það eigi mjög vel um systurnar þar sem þær eru báðar frekar lítt húslegar og finna ekki knýjandi þörf hjá sér að vakna til að fara að taka til og þvo þvott. Þær teljast því báðar heimahangandi þessi misserin þótt þær telji það nú ekki eftir sér að sinna fjölskyldumeðlimum ef svo ber undir.
Annars verður húsmóðirin illilega vör við það þessa dagana að það fer að styttast í jólin og ritgerðasmíð er enn ekki hafin. Þar sem sú stutta byrjar hjá dagmömmu í næstu viku eru þó allar líkur á að einhver vinna við ritgerðina hefjist fyrir jól. Svo þarf bara að vera þeim mun duglegri eftir jól. Það verður nú ljúft að geta farið að vinna og geta kannski keypt sér peysu af og til án þess að þurfa endilega að vera að rýna of mikið í verðmiðann. Ég tala nú ekki um ef maður gæti bara farið út í búð og keypt sér stígvél! Þá verður húsmóðirin farin að dansa og getur hætt að vera heimahangandi.

Dugleg stelpa

Húsmóðirin var dugleg í dag, þó alls ekki við hefðbundin húsmóður störf. Nei, frúin sat sveitt yfir fræðigreinum og markaðsrannsóknum á meðan sú stutta skemmti sér hjá ömmu sinni. Nú stefnir líka í að húsmóðirin fari að vera öflugri námsmaður þar sem pláss hjá dagmömmu fyrir þá stuttu er í sjónmáli. Svo er bara að spýta í lófana og ná að útskrifast í júní. Go, go, go!

kosningadagur

Húsmóðurinni finnst gaman að kjósa. Í gær skundaði hún á kjörstað ásamt móður, föður, afa og börnunum tveimur - fjórir ættliðir á kjörstað, geri aðrir betur. Þegar allir voru búnir að númera af hjartans lyst lá leiðin í Perluna þar sem belgískar vöfflur og ís voru innbyrt af mikilli áfergju. Svona á maður líka að gera þetta - gera sér glaðan dag í kringum kosningar. Fjórir ættiliðir skemmtu sér stórvel þótt ekki hafi allir verið sammála um hvernig númerunum var raðað - en það er önnur saga.

vagg og velta

Það er dálítið fyndið að fylgjast með einstaklingi komast allra sinna ferða ýmist með því að velta sér um gólfið eða tosa sig áfram sitjandi á rassinum. Þessu má húsmóðirin fylgjast með þessa dagana en prinsessan er orðin ansi hreyfanleg. Farin að komast yfir þröskulda þannig að næsta skref er að loka öllum hurðum ef halda á barninu í sjónmáli. Húsmóðirin hefur verið önnum kafin við að koma öryggislokum fyrir í öllum innstungum og sennilega er ekki langt í að taka þurfi dvd-spilarann úr sambandi. Prinsessunni tókst allavega að opna hann um daginn og gerir eflaust tilraun til þess aftur. Húsmóðirin hefur enn ekki lagt í að leita að videó-öryggishlífinni í geymslunni enda hefur prinsessan ekki fest höndina nema einu sinni í tækinu. Sumir myndu þó segja að það væri einu sinni of oft. Best að ráðast á geymsluna í dag.