Hörföt í kulda og trekki

Karlkyns verslunarstjóri í fínni búð í Kringlunni er stundum að skottast í Odda. Er greinilega að bæta við kunnáttuna til að geta rekið fínu búðina ennþá betur. Miðvikudagar virðast vera hans lærdómsdagar og í morgun gekk hann stigann upp á þriðju hæð á undan húsmóðurinni. Þetta er nú varla í frásögur færandi nema hvað að maðurinn var klæddur í ljós hörjakkaföt. Og svona fyrir ykkur sem ekki vita það þá er strekkingsvindur og 0°C í Reykjavík í dag. Maður hebbdi nú haldið að maður sem lifir og hrærist í tískuheimi karla ætti að hafa meira "fashion sense" en svo að klæðast sumarfatnaði um hávetur. En svo bregðast krosstré sem önnur...

Unbutton your top

Þegar þreyttir meistaranemar eru búnir að ræða of mikið um upplýsingaflæði og stjórnskipulag og þvæla hugtökunum "bottom-up" og "top-down" of mikið fram og tilbaka verður útkoman: "unbutton your top!" sem hefur samkvæmt bandarískum kvikmyndum löngum verið ágætis leið til framgangs kvenþjóðarinnar innan stórfyrirtækja.

Blóðgjöf

Húsmóðirin tók ákvörðun um að gerast blóðgjafi. Í því skyni var skundað inn í hreint ótrúlegt farartæki sem þá stundina stóð fyrir utan Odda. Þar þurfti hún að lýsa því yfir að hafa aldrei stundað vændi né sprautað sig með fíkniefnum og svona sitthvað fleira sem skiptir víst máli þegar kemur að því að gerast blóðgjafi. Þá lét hún af hendi nokkra blóðdropa til prufu. Innan 14 daga verður ljóst hvort húsmóðirin er heppilegur blóðgjafi eður ei.
Það sem er sérstaklega skemmtilegt við þessa framkvæmd húsmóðurinnar er að ákvörðunin um að gerast blóðgjafi var tekin fyrir u.þ.b. 4 árum. Það hefur bara tekið þetta langan tíma að rata inn í Blóðbanka. Nú vonast húsmóðirin hins vegar til að hún geti vanið komur sínar reglulega í þennan skemmtilega banka og ávaxtað skátapundið með því að láta gott af sér leiða. Hvetur hún lesendur til að gera slíkt hið sama.

að vera ekki einhleyp

Húsmóðirin er glöð yfir því að vera ekki einhleyp. Undanfarna daga hefur stjörnulögfræðingurinn legið undir feldi og kveinkað sér undan hita, hálsbólgu og beinverkjum. Á sama tíma hefur sú stutta tekið upp á því að kasta upp annað slagið. Fyrir vikið fær hún aukna athygli sem kveikir á óþekktartakkanum á drengnum. Húsmóðirin hefur því staðið í ströngu undanfarið og fundið illilega fyrir því hvernig ástandið væri nú ef hún þyrfti að standa ein í því að siða börnin, hreinsa upp ælu, þvo þvott, elda mat og allt hitt sem einhvernveginn gerist eða gerist ekki innan veggja heimilisins. Það verður því fegin húsmóðir sem sér á eftir stjörnulögfræðingnum aftur í vinnu - fullviss um að hann hafi smá aukreitisorku til að sinna heimilisstörfum þegar heim er komið.

Sátt

Húsmóðirin er óðum að taka Glitni í sátt. Var í upphafi frekar ósátt við nafnið og fannst rauði liturinn alltof æpandi. Gamla nafnið var einhvernveginni miklu betra og heimilislegra. Svo rataði diskurinn í spilarann og allt varð gott. Nú syngur húsmóðirin með Bubba, Stebba og Ragnheiði lögin sem hana langaði alltaf að eiga en vissi það ekki fyrr en hún eignaðist þau. Glitnir er góður og húsmóðirin tekur ofan fyrir B. Ármannssyni & Co. fyrir markaðsstunt ársins.

Myndir

Nýjar myndir af prinsessunni. Húsmóðirin á það til að taka sig saman í andlitinu og hætta letinni ;)

Á slæmum stað á slæmum tíma

Húsmóðurinni þótti ekki gaman að sitja á klósettinu þegar jarðskjálfti reið yfir...

Mission: Hasarkroppar

Húsmóðirin er búin að finna sér mission. Hún og nánasta samstarfskona hennar hafa tekið ákvörðun um að í sumar verði þær orðnar hasarkroppar. Til aðstoðar hafa þær fengið Mörtu Ernstdóttur (þessi sem sést hlaupandi hvar sem maður drepur niður fæti í bænum) sem mun píska þær áfram tvisvar í viku fram á sumar. Að auki munu þær stunda tækjasal íþróttahúss háskólans og æfa sig í að gera armbeygjur a´la Íþróttaálfurinn. Slíkar armbeygjur eru nokkuð snúnar en í þeim felst að lyfta sér nægjanlega upp úr beygjunni til að hægt sé að klappa saman höndum áður en næsta beygja tekur við. Húsmóðirin er ágætlega stödd í armbeygjulistinni og getur gert eina og hálfa Íþróttaálfsarmbeygju. Samstarfskonan þarf hins vegar að æfa sig aðeins meira - hún endaði flöt á maganum þegar síðast var gerð tilraun til klapps í miðri armbeygju (sjúkket að hún er ekki með silikon því pokarnir hefðu pottþétt sprungið). Húsmóðirin og samstarfskonan eru búnar að uppgötva keppnismanneskjuna í sér þannig að þær verða eflaust farnar að gera armbeygjur á annarri fyrr en varir.

Það eru því vinsamleg tilmæli til velunnarra húsmóðurinnar að vara sig í Nauthólsvíkinni í sumar. Það verða tveir hasarkroppar þar á ferð í góða veðrinu!