Geeeiiiisp....

Húsmóðirin er bara þreytt. Vaknandi börn og kvefpest eiga stóran þátt í þreytunni. Það tekur líka sinn toll að byrja í nýrri vinnu. Ofan á allt þetta var afmælisveisla hjá Garðabæjarguttanum og endaði húsmóðirin ein með ísétandi og vansvefta kríli á meðan stjörnulögfræðingurinn tók enn eitt skrefið í átt að því að gera heiminn að betri stað. Er ekki framfylgni réttvísinnar annars skref í þá átt? En núna eru krílin í það minnsta sofnuð, stjörnulögfræðingurinn kominn heim og húsmóðirin um það bil að hrynja niður. Best að bursta tennur fyrst, kúra sig svo upp í rúm og vona og biðja til Guðs að börnin sofi framyfir sex. Bið ekki um meira.

Snjókast

Segja má að snjókast hafi riðið yfir Reykjavíkurborg. Húsmóðirin varð að sanna það að hún ætti besta jeppann í bænum og ók af stað til að koma flísfatnaði til aldraðs afa sem liggur og skelfur úr kulda á einu sjúkrahúsi bæjarins. Leiðangurinn gekk áfallalaust en eftir á að hyggja hefði húsmóðirin e.t.v. átt að bíða með leiðangurinn í nokkra klukkutíma. Ansi mikið af strönduðum bílum út um allt sem gerðu ekkert annað en að flækjast fyrir.
Eftir hádegislúrinn, sem húsmóðirin og prinsessan á heimilinu tóku saman, klæddi öll fjölskyldan sig í útigalla og arkaði út í snjóinn. Farið var í heilmikið snjókast en prinsessan átti í örlitlum erfiðleikum með að fóta sig í snjónum sem náði henni upp að mitti.
Það var bara gaman að leika sér í snjónum og fagnar húsmóðirin snjónum. Í það minnsta þar til hún þarf að komast í vinnuna í fyrramálið.

Hitabylgja

Hitamælirinn í eldhúsinu sýnir -5,7°C. "Hmm, það er bara heitt," hugsar húsmóðirin. Aldur er greinilega ekki það eina sem er afstætt.

Dagur tvö

gekk vel. Húsmóðirin mátti koma frá sér heilli markaðsáætlun fyrir einn ársfjórðung. Það var nú létt verk og löðurmannslegt. Skrifaði svo fullt af texta, lagaði og stytti þannig að læsilegt væri. Svo er þetta bara spurning um að læra á fyrirtækið og geta farið að skipta sér af því hvernig kaupin gerast á eyrinni...

Fyrsti dagurinn

Þá er að kveldi kominn fyrsti dagur húsmóðurinnar sem vinnandi konu eftir 3ja ára námshlé. Dagurinn gekk stóráfallalaust fyrir sig fyrir utan að tölvufyrirtækið gat ekki haft tölvu tilbúna fyrir nýja starfsmanninn. Þeim til varnar töldu þeir tölvuna tilbúna en þegar til kastana koma þá var eitthvað pikkles í stýrikerfinu og því þurfti að setja vélina upp aftur. En þegar hún var komin í dokkuna um klukkan þrjú síðdegis gekk allt eins og í sögu. En sökum tölvuleysis þá verður sennilega meira gert af viti á morgun.

Meðal þess sem húsmóðurinni líst vel á í nýju vinnunni er mötuneytið. Hún hefur aldrei búið við þann lúxus að hafa mötuneyti í vinnunni og hlakkar hún til að borða ferskt salat og góðan mat á hverjum degi. Þá sér húsmóðirin fram á einfaldari eldamennsku í miðri viku þar sem börnin fá heitan mat í leikskólanum. Stjörnulögfræðingurinn verður bara að bíta í það súra að vera sá eini sem ekki fær heitan mat í hverju hádegi.

minidv, dvd eða harður diskur

Þessu er húsmóðirin að velta fyrir sér þessa dagana. Er samt eiginlega komin að þeirri niðurstöðu að minidv sé málið. Langbesti endingartíminn og minnst vesen. Strákurinn í Sony center hitti alveg naglann á höfuðið þegar hann benti á að ef maður tæki upp á minidv þá væri hægt að sýna myndir af rollingunum eftir 20 til 30 ár í brúðkaupinu þeirra, dvd diskurinn væri ónýtur og líklegt að harða drifið í tölvunni verði löngu komið á haugana. Þannig að lendingin verður sennilega minidv og þá er þetta bara spurning um megapixla, flögustærð og hversu nett vélin sjálf er. Húsmóðirin er farin að hallast að því að Sony sé málið en á reyndar alveg eftir að skoða JVC vélarnar - fer í það eftir hádegið. En það eru allavega miklar líkur á því að krílin verði mynduð í bak og fyrir þessi jól. Eins gott að þau sýni á sér sparihliðina - annars á hin hliðin eftir að koma í bakið á þeim þegar þau gifta sig. Múhaha...