Gríðarleg vonbrigði

Húsmóðirin varð fyrir töluverðu áfalli við sjónvarpsgláp í gærkvöld. Á dagskrá var hinn mjög svo áhugaverði (svo ekki sé talað um spennandi) þáttur Project Runway. Í gær voru fjórir keppendur eftir og fengu þeir það hlutverk að hanna kjól fyrir íðilfagra sjónvarpskonu sem var á leið á Grammy-verðlaunahátíðina. Út úr tárum, brosum og saumsporum keppenda komu að lokum fjórir kjólar sem dómararnir kepptust síðan við að rakka niður. Skemmst er frá því að segja að ofurkrúttulegi homminn með glossið, hann Austin Scarlett, var sendur heim og Wendy með röndótta hárið sem allir hata vann áskorunina! Nú skal húsmóðirin alveg viðurkenna að kjóllinn hennar Wendy var aðeins meira viðeigandi fyrir tilefnið og Austin hefði alveg mátt hemja sig í silkislæðunum og fjólubláa litnum en þetta var samt áfall. Húsmóðirin hélt nefnilega ákaft með Austin og var búin að bóka það að hann myndi vinna þessa keppni. Sannfæringin um að Austin Scarlett eigi eftir að spjara sig í tískuheiminum þrátt fyrir þessi úrslit bætti þó ástandið örlítið og vonandi kemur að því að spurningunni "Who are you wearing?" sem iðulega er kastað inn á rauða dregilinn verði einhvern daginn svarað "Austin Scarlett".

Fuglahljóð

Rökhugsun húsmóðursonarins er oft og tíðum skemmtileg.
Drengurinn: Hvernig segja kríurnar?
Húsmóðirin: Þær segja krí, krí...
Drengurinn: Já, já.
Húsmóðirin: En hvernig segja lóurnar?
Drengurinn: Ló, ló???

5 ósýnileg skref

Húsmóðirin eyddi hluta úr öðrum páskadegi með drengnum á slysavarðsstofunni. Þar fékk hann blátt alvöru töfralím sem er notað til að líma saman svona stráka eftir að hafa kynnt sig með fullu nafni, tekið í höndina á lækninum og skýrt skilmerkilga frá því hvernig slysið vildi til. Á meðan húsmóðirin og drengurinn voru önnum kafin á slysavarðsstofunni tók sú stutta sig til og gekk 5 skref hjálparlaust. Svona er nú að eiga tvö börn - ekki hægt að taka þátt í öllu með þeim báðum.

Gleðilega páska

Húsmóðirin óskar landsmönnum til sjávar og sveita gleðilegra páska. Fjölskyldan hefur haft það einstaklega gott um páskana og slakað vel á. Páskaeggin fengu svo að kenna á því í morgun og gaf sú stutta bróður sínum ekkert eftir í súkkulaðiáti. Húsmóðirin endaði á að fjarlægja allt súkkulaði úr augsýn en sú stutta hætti ekki að segja "mei mei". Það verður beðið fram að jólum með að gefa henni súkkulaði aftur.

Systir húsmóðurinnar mætti með mannauðinn sinn í páskamatinn. Allir borðuðu kalkún og meðlæti og átu á sig gat. Nú sitja húsmóðirin og stjörnulögfræðingurinn fyrir framan sitthvora tölvuna, hann að vinna, hún að svíkjast um að læra. Maður getur nú ekki slappað af alla páskana...

Survivor - Oddi

Húsmóðirin hefur undanfarnar vikur tekið þátt í allsvakalegum Survivor-leik. Þátttakendur eru allir egóistar og öllum finnst þeirra skoðun sú eina rétta. Leikurinn gengur svo út á að koma sinni skoðun í gegn og fá hópinn til að samþykkja niðurstöðuna sem hina einu réttu. Leikurinn er flókinn, stefnumiðuð bandalög hafa myndast og óvinir orðið til. Undir það síðasta hefur þó reynst nauðsynlegt að sætta öll ágreiningsmál til að ná markmiðinu. Hópurinn þarf að skila sameiginlegri niðurstöðu og það er öllum í hag að hún sé sett fram á sem skýrastan hátt. Undir lokin sættast allir en það skrýtna við þennan leik að enginn einn sigurvegari stendur eftir - hópurinn er sigurvegarinn.

Svona er að vinna hópvinnuverkefni í Viðskipta- og hagfræðideild HÍ.