Afrek

Húsmóðirin vann afrek á föstudagskvöldið. Hljóp fimm kílómetra í Jónsmessunæturhlaupi og var ekki síðust í mark. Yeessssss....

En í fullri alvöru þá var þetta alveg magnað. Hver hefði trúað því að antisportistinn, húsmóðirin í austurbænum, myndi keppa í hlaupi. Tilfinningin var ólýsanleg þegar húsmóðirin hljóp í mark. Tvennt gerði tilfinninguna enn skemmtilegri, annarsvegar kom húsmóðirin í mark strax á eftir Mörthu Ernstdóttur (sem reyndar var búin að hlaupa 10 km ...) og svo var nafn húsmóðurinnar básúnað í gegnum gjallarhorn þegar hún nálgaðist markið. Gjallarhornsmaðurinn reyndist vera gamall skólabróðir sem ákvað að hvetja húsmóðurina síðustu metrana.

Og svo er bara að halda áfram að hlaupa - ætli húsmóðirin endi eins og Forrest Gump???

Konur konum verstar

Húsmóðirin hlustaði á hinn ofurdjúpa og stórmerkilega þátt Ísland í bítið í útvarpinu á leið sinni vestur í bæ í morgun. Þar var mættur tískusérfræðingur sem hélt því fram fullum fetum að nú væri besti tíminn fyrir okkur konurnar að kaupa okkur allt sem hugurinn hefði girnst í langan tíma. Ástæðan? Jú, það ku standa yfir heimsmeistarakeppni í fótbolta og samkvæmt "sérfræðingnum" þá er svo fínt að biðja karlinn um leyfi fyrir kaupunum þegar leikur er nýbyrjaður. Að hennar sögn segja þeir þá já við öllu. Húsmóðirin hefur ýmislegt við þessa röksemdarfærslu að athuga en það sem æpir framan í mann er: Af hverju þarf konan að biðja karlinn um leyfi fyrir því sem hana langar að kaupa? Veit konan ekki hvort hún á fyrir því sem kaupa á eða er hún einfaldlega (í heimsku sinni dirfist ég að segja) að fá leyfi fyrir því að skuldsetja heimilið fyrir einhverju sem mjög líklega er ekki brýn þörf á að kaupa. Umræðan í téðum þætti fór svo út í spjall um brúnkukrem og kampavínsúða til að fríska sig á ströndinni þannig að ég efast um að "sérfræðingurinn" hafi verið með lífsnauðsynjar í huga.
Húsmóðurinn finnst með ólíkindum að konur skulu enn hugsa með þessum þætti hvað þá tjá sig um það á opinberum vettvangi að þær hafi hvorki sjálfstæðan fjárhag né skynsemi til að meta hvernig þeim peningum sem falla til heimilisins sé best varið.
Húsmóðirin skammaði hlaupafélaga sinn um daginn þegar hún sagðist ekki hafa fundið "hitt" buffið sitt og gæti hreinlega ekki hlaupið með það sem hún fann því að það er með hermannamynstri. "For kræing át lád," sagði húsmóðirin. "Þú ert að fara út að hlaupa!" og bætti svo við að svona viðhorf væri ástæðan fyrir óútskýrðum launamun kynjanna. Og við þetta stendur húsmóðirin - ástæðan fyrir launamun kynjanna er ekki að karlar vilji ekki borga konum jafnhá laun. Ástæðan liggur mun dýpra og kristallast í þessum asnagangi í konum þegar þær geta ekki farið út að hlaupa með hermannabuff og forheimskast við að eyða peningum, sem ekki eru til, í vitleysu, sem engin þörf er á, með ómeðvitaða "leyfi" frá karlinum sem situr heima og skynjar ekki umhverfi sitt því hann er á kafi í fótboltaleik.
Húsmóðirin endurtekur: "For kræing át lád!" Er þetta í alvörunni svona?

Ömurlegasta mamma í heimi

Þá er það staðfest! Húsmóðirin er ömurlegasta mamma í heimi. Hún er alveg ömurleg að leyfa ekki drengnum að vera uppi á skiptiborði um leið og skipt er á stúlkunni. Alveg Ö-M-U-R-L-E-G!!! Aldrei má maður ekki neitt! Drengurinn var kominn hálfa leið út í Hagkaup til að athuga hvort ekki væri hægt að fá bara nýja mömmu sem væri ekki svona ömurleg. Episódinn endaði þó ágætlega og ömurlega mamman og drengurinn sættust á að vera vinir. Húsmóðirin þurfti reyndar að halda niðri í sér hlátrinum á meðan á þessu ömurlegheitamáli stóð - en um leið giskar hún á að þetta verði ekki í síðasta skipti sem hún fái þennan ægilega fína titil. Húsmóðrin hefur heldur aldrei verið mikið fyrir miðjumoð - best að vera bara ömurlegurst í heimi fyrst maður er eitthvað ömurlegur á annað borð...

Nýjasta æðið

Þar sem húsmóðirin þarf að fara í mikla sjálfskoðun á næstunni og vita nákvæmlega hvernig hún á að lýsa sjálfri sér fyrir væntanlegum vinnuveitendum er mjög mikilvægt að allir hjálpi til við að búa til "Johari" prófíl. Fara inn á linkinn og gefa álit - tekur enga stund.
http://kevan.org/johari?name=Húsmóðir+í+austurbænum

Áfram Barca!!!

Húsmóðirin er hæstánægð með þær fréttir að Eiður Smári sé búinn að skrifa undir samning við Barcelona. Nú hefur hún ærna ástæðu til að draga stjörnulögfræðinginn til Spánar og á fótboltaleik. Alls ekki ólíklegt að Ramblan verði þá gengin nokkuð hressilega um leið og borgin tekin almennilega út. Í tilefni dagsins klæddist drengurinn Barca búningi frá toppi til táar. Nú mega fótboltastrákarnir í leikskólanum fara að vara sig. Svei mér þá ef Barca smekkurinn verður ekki notaður á prinsessuna í kvöld. Svei mér þá hvað húsmóðirin er ánægð með þetta. Svei mér þá...

Tilgangurinn með gapinu

Húsmóðirin hefur löngum furðað sig á undarlegum innanhússarkitektúr á baðherberginu á heimilinu. Sér í lagi hefur gap milli baðkars og sturtuklefa vakið furðu hennar en eini sjáanlegi tilgangurinn með þessu gapi hefur hingað til verið sá að safna skít. Síðastliðinn laugardag varð þó breyting á og gapið fékk allt í einu tilgang. Þar sem húsmóðirin lá í baði og slakaði á kom drengurinn inn á bað og óskaði eftir félagsskap móður sinnar. Eina leiðin til að gera gott úr ástandinu var að fela drengnum verkefni. Það varð því úr að drengurinn kom sér fyrir í gapinu margumtalaða og nuddaði hársvörð móður sinnar af mikilli list. Næst tók við hárnærinarmeðferð og að lokum fékk móðirin andlitsnudd með skrúbbkremi. Mitt í þessari dekurmeðferð áttaði húsmóðirin sig á því að ef gapið væri ekki til staðar hefði meðferðin ekki átt sér stað. Sennilegast er því að gapið hafi verið hannað með það í huga að fjögurra ára drengir gætu staðið við baðkarsendann og dekrað við mæður sínar. Hvort sem það er rétt eða ekki verður það með mun meiri gleði í hjarta sem húsmóðirin þrífur gapið næst.

Um allt og ekkert

Húsmóðirin var að hugsa um að skrifa nokkur orð um fárið á fyrrum vinnustað hennar en komst að því að það yrði alltof löng færsla. Endalaust hægt að skrifa um vitleysuna sem á sér stað á þeim vinnustað. Ein spurning samt: Hvers konar kókópöffs MBA próf er það sem fólk er með sem stendur í þeirri trú að hægt sé að segja upp stjórnendum og láta þá vinna út uppsagnafrestinn án þess að það komi neikvætt út fyrir reksturinn? Hef nefnilega aldrei heyrt um svoleiðis en er kannski bara í röngum skóla.
Annars er húsmóðrin búin að komast að því að hún finnur ekkert ef hún er að leita að því. Hið dularfulla buff-hvarfs-mál var til lykta leitt í morgun þegar stjörnulögfræðingurinn ætlaði að fara að setja töskurnar inn í geymslu. Leyndist ekki buffið í einu af fjölmörgum hólfum sem húsmóðirin var búin að kemba. Er stjörnulögfræðingurinn grunaður um að hafa vísvitandi falið buffið til að þykjast finna það og virka voða fundvís. Já, það var örugglega þannig sem þetta gerðist. Ekki séns að buffið hafi farið framhjá húsmóðurinni. Svoleiðis gerist barasta ekki...