Skrýtin tilfinning

Húsmóðirin skilaði ritgerðinni í dag. Var óglatt alla leiðina vestur í Odda. Leið ekki mikið betur á leiðinni heim. Eitthvað undarlegt tómarúm og óvissa um framtíðina að snúa maganum á hvolf.

Hvað gera bændur nú?

Lítill snillingur

Húsmóðirin minntist á það við heimilisfólkið í gær að nú væri ritgerðin tilbúin. Drengurinn sýndi strax viðbrögð "Mamma, er ritgerðin búin. Þá getur þú farið að vinna". "Já," svaraði móðirin. "Hvar finnst þér að mamma ætti að fara að vinna?" Ekki stóð á svari hjá drengnum. "Hvar langar þig að vinna mamma mín?"

Ef lífið væri svona einfalt...

Sjúkraflutningar ehf.

Ættmóðirin var flutt heim í dag. Húsmóðirin sá um flutningana og verður í sjúkraflutningum næstu daga þar sem ættmóðirin neyðist til að sækja sjúkrahúsið heim þrisvar á sólarhring til að þiggja sýklalyfjagjöf. Hvorki reyndist pláss á sjúkrahúsinu né í heimaþjónustu fyrir stjórnarnefndarmanninn. Greinilegt að ekki er verið að fara í sérstakt manngreinaálit á þeim bænum.

Húsmóðirin var samt óendanlega glöð að sjá ættmóðurina komna aftur í sitt eðlilega umhverfi. Og það voru börnin líka. Það var gott að fá ömmu heim.

Þannig fór um sjóferð þá

Eflaust eru enn einhverjir sem standa í þeirri trú að húsmóðirin sé stödd í sól og sumri á Spáni. En sú er nú ekki raunin. Tveimur dögum fyrir brottför var sú ákvörðun tekin að fresta ferðinni. Ástæðan var sú að ættmóðirin veiktist hastarlega og var lögð inn á sjúkrahús. Því var lítið annað að gera en að hætta við ferðina. Ættmóðirin hefur engu að síður sjávarsýnina sem lofað var - reyndar út á Fossvog en ekki Miðjarðarhaf.

Þar sem að ritgerðin var svo gott sem tilbúin og komin til leiðbeinanda í yfirlestur hefur húsmóðirin haft lítið annað að gera en sinna húsmóðurlegum skyldum sínum. Íbúðin er því til algerrar fyrirmyndar þessa dagana og hafa heimilismenn áttað sig á að það er nú bara nokkuð huggulegt hér í nýja miðbænum. Plássleysi hrjáir okkur örlítið engu að síður. En nú þykir húsmóðurinn nóg komið af heimilisstörfum og vill komast út á vinnumarkaðinn. Allir sem luma á draumavinnu fyrir hámenntaða húsmóður skrifi komment.